ភ្នំពេញ៖ បញ្ជាការកងទ័ពជើងគោកកម្ពុជាលោកឧត្តមសេនីយឯក ហ៊ុន ម៉ាណែត និងមេបញ្ជាការទ័ពជើងគោកថៃលោក ណារ៉ុងផាន់ ជិតកែវធែ (Narongpan Jitkaewtae) បានសម្រេចចុះហត្ថលេខាលើ «លក្ខខណ្ឌស្តីពីកិច្ចសហប្រតិបត្តិការ (Tems of Reference – ToR)» រវាងកងទ័ពជើងគោកនៃប្រទេសទាំងពីរ ដែលជាឯកសារសំខាន់ដើម្បីត្រួសត្រាយផ្លូវ ឈានទៅលើកកម្ពស់កិច្ចសហប្រតិបត្តិការលើគ្រប់វិស័យក្នុងក្របខ័ណ្ឌកងទ័ពជើងគោកឱ្យមានកម្រិតកាន់តែខ្ពស់ឡើងបន្ថែមទៀត។

កងទ័ពជើងគោកបានចាត់ទុកព្រឹត្តិការណ៍ជាការបើកទំព័រប្រវត្តិសាស្ត្រថ្មីមួយទៀតនៃកិច្ចទំនាក់ទំនងរវាងកងទ័ពជើងគោកទាំងពីរផងដែរ។

លក្ខខណ្ឌស្ដីពីកិច្ចសហប្រតិបត្តិការ Trem of Reference (TOcaR) គឺជាព្រមព្រៀងមួយក្នុងការរៀបចំរចនាសម្ព័ន្ធការងារ គណៈកម្មការ កាលវិភាគនៃការប្រជុំ ការចរចារ ការគាំទ្រផ្នែករដ្ឋបាល និងដំណើករានៃការដោះស្រាយវិវាទជាដើម។

ការចុះហត្ថលេខាលើលក្ខខណ្ឌនេះធ្វើឡើងក្នុងដំណើរទស្សនកិច្ចរបស់មេបញ្ជាការទ័ពជើងគោកថៃលោក ណារ៉ុងផាន់ ជិតកែវធែ មកកម្ពុជាជាលើកដំបូងនៅព្រឹកថ្ងៃទី៣ ខែកុម្ភៈនេះ។ ក្នុងដំណើរទស្សនកិច្ចនេះកម្ពុជា-ថៃ បានប្ដេជ្ញាខិតខំចូលរួមចំណែកក្នុងការកសាងនិងពង្រឹងតំបន់ព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍ ដោយឈរលើស្មារតីអត់ធ្មត់ និងសម្រប សម្រួលដោះស្រាយបញ្ហាតាមយន្តការគ្រប់កម្រិត ក្នុងគោលការណ៍គោរពឯករាជ្យ អធិបតេយ្យ និងបូរណភាព ទឹកដីទៅវិញទៅមក។

ក្នុងសេចក្ដីប្រកាសព័ត៌មានរបស់កងទ័ពជើងគោកឱ្យដឹងថា៖ «សន្តិភាព សន្តិសុខ និងស្ថិរភាពនៅតាមបណ្ដោយព្រំដែន គឺពិតជាបានបង្កនូវលក្ខណៈ អំណោយផលដល់ការដោះដូរពាណិជ្ជកម្មឆ្លងដែន ដែលជាការចូលរួមចំណែកយ៉ាងសំខាន់ ក្នុងការបង្កើត ឱកាសការងារ និងការលើកកម្ពស់ជីវភាពរបស់ប្រជាជននៃប្រទេសទាំងពិរ»។

កម្ពុជា-ថៃមានព្រំដែនអន្តរជាតិជាមួយគ្នាប្រវែង ៨១៧គីឡូម៉ែត្រចាប់ពីឈូងសមុទ្រថៃនៅខាងត្បូងរហូតដល់ប្រទេសឡាវនៅភាគខាងជើងឈាងខាងកើត។ ក្នុងឆ្នាំ២០១១ ប្រទេសទាំងពីរបានចូលទៅក្នុងសង្គ្រាមម្ដងនៅពេលដែលទ័ពថៃបានលើកមកឈ្លានពានតំបន់ព្រះវិហាររបស់កម្ពុជា៕